កម្ពុជា

ចែកចាយតាមរយ៖

បុរសម្នាក់​បាន​លង់​ទឹក​ស្លាប់ ខណះ​រូបគេ​ចេញ​ពី​លើក​លប​ក្នុង​ទន្លេ​ជាមួយ​ឪពុក កាលពី​ព្រឹក​មិញ​​នេះ។ បុរស​ជាជនរង​គ្រោះ​មាន​ឈ្មោះ​ឃុត​ គង់ អាយុ​៣១ឆ្នាំ មាន​ប្រពន្ធ​ឈ្មោះ​ឡោ​ សុខ​ណា អាយុ​២៦ឆ្នាំ និង​មាន​កូនតូចៗ​ពីរនាក់​ក្នុង​បន្ទុក។ ជនរងគ្រោះ​ប្រកប​របរ​នេសាទ​និង​ធ្វើ​ចំការ ដែល​មាន​ទីលំនៅ នៅ​ភូមិ​ឬស្សី​ដង្កួត ឃុំ​ជលសារ ស្រុក​ជលគិរី ខេត្ត​កំពង់​ឆ្នាំង។ តាម ប្រភព​ពីសមត្ថកិច្ច​ស្រុក​ជល​គិរី បាន​អោយ​ដឹងថា នៅ​មុន​ពេល​កើត​ហេតុ ជន​រងគ្រោះ​បានចែវ ទូក​ទៅ​លើកលប​នៅ​ក្នុង​ទន្លេ ក្រោយ​ពីលើក​រួច ឪពុក​ជនរង​គ្រោះ​បាន​ឡើង​ទៅ​លើគោក​ដើម្បី បត់​ជើង ដោយ​ទុកអោយ​ជន​រងគ្រោះ​នៅ​លើ​ទូក​ម្នាក់ឯង ខណះ​នោះ​ស្រាប់តែ​ជនរង​គ្រោះ មាន​អាការះ​ប្រកាច់​ធ្លាក់​ទឹក​តែម្តង។ សមត្ថកិច្ច​បាន​អោយដឹង​ទៀតថា ជនរង​គ្រោះ​កន្លងមក មាន​ជំងឺ​ប្រកាច់​ជាប្រចាំ (ជំងឺឆ្កួតជ្រូក)។ ក្រោយ​ពេល​កើតហេតុ ជន​រងគ្រោះ ត្រូវ​បាន​ក្រុមគ្រួ សារ​យក​ទៅធ្វើបុណ្យ​តាម​ប្រពៃណី។

ដោយឡែក​ក្មេងស្រី​ម្នាក់ អាយុ៧ឆ្នាំ បាន​ធ្លាក់​អណ្តូង​លង់​ទឹក​ស្លាប់ ខណះ​ដែល​កំពុង​រត់​លេង ជាមួយ​ក្មេងៗ​នៅ​ក្នុង​ភូមិ។ ក្មេង​ស្រី​រងគ្រោះ​ត្រូវ​បានគេ​ស្គាល់​ឈ្មោះថា ផឿន សុខជា អាយុ​៧​ឆ្នាំ រស់នៅ​ជាមួយ​ជីដូន ដែល​មាន​ទីលំនៅ នៅ​ភូមិដា ឃុំដា ស្រុក​កំពង់​លែង ខណះ​ដែល​ឪពុក​​​ម្តាយ​​ចេញ​ទៅធ្វើការ​នៅប្រទេស​ថៃ​។ ហេតុការណ៍​ក្មេងស្រី​ធ្លាក់​អណ្តូង​លង់ទឹក​ស្លាប់​នេះ  បាន​កើតឡើង​កាល​ពីម៉ោង​៥ល្ងាច​ថ្ងៃទី​៣១កក្កដា។ បច្ចុប្បន្ន​សាកសព​ក្មេងស្រី​រងគ្រោះ ត្រូវ​បាន​ក្រុម​គ្រួសារ​យក​ទៅ​ធ្វើ​បុណ្យ​តាម​ប្រពៃណី៕